domingo, 19 de fevereiro de 2012

¿Quén viaxa en avión?. O absurdo das subvencións ás compañías aéreas

Anuncia a Xunta de Galicia que pon fin ás subvencións a compañías aéreas que voan dende Alvedro e Peinador. O argumento é que se ten constatado o fracaso destas políticas como instrumento para incrementar o número de turistas que visitan Galicia.

Aínda así, sen embargo, mantén a subvención a Ryanair que voa dende Lavacolla e que seguirá cobrando un millón de euros en 2012, e outro millón de euros en 2013. Decisión que non cadra coa razón que se da para cesar as subvencións ás compañías que operan dende Alvedro e dende Peinador.

Á vista dos datos que se amosan a continuación, parece máis que xustificada a decisión de deixar de achegar diñeiro público para manter artificialmente voos dende os nosos aeroportos. O que non se entende ben é por qué se mantén a excepcionalidade de Lavacolla.

Táboa I. Evolución do número de pasaxeiros en avión 2008-2011

Na táboa I, móstrase a evolución no número de pasaxeiros nos diferentes aeroportos. A pesar das subvencións públicas, o tráfico aeroportuario en Galicia só se incrementou nun 2,70% nos últimos catro anos. Iso si, concentrouse fortemente en Lavacolla que medrou un 28,56%, ao tempo que Alvedro descendía un -13,06% e Peinador un -22,18%. Dende logo, ese crecemento de Lavacolla non é alleo ao notablemente maior volume de subvencións que reciben as compañías que operan nese aeroporto. No mesmo período, o Sa Carneiro de Porto incrementou o número de pasaxeiros un 32,38%. 

Para entender ben o absurdo destas políticas de subvención que dende hai anos ven levando a cabo o goberno galego, sería interesante dispor de estatísticas sobre a mobilidade de longa distancia da poboación.

Desgraciadamente, eses datos non existen. Só puidemos localizar algúns datos illados a nivel español. Por exemplo, o 20% da poboación acapara o 80% dos viaxes de ocio. Un de cada dez españois nunca saíu da súa provincia de nacemento, e o 15% non saíu da súa comunidade autónoma. O 48% da poboación española non saíu nunca de España. Só un 7% de españois viaxaron por ocio ao estranxeiro en 2009. 

A nivel internacional, os poucos datos que conseguimos encontrar, e que poden servir de referencia para o caso galego, indican, por exemplo que en Suíza un 16% da poboación nunca viaxou en avión. Cifra que se eleva ata o 32,60% si se consideran aquelas persoas que non voaron nos últimos cinco anos. O que pon en evidencia a exclusión da mobilidade aérea dun segmento relevante da cidadanía. Como cabía esperar, as diferenzas de renda xogan un papel determinante á hora de explicar quén e con que frecuencia viaxa en avión. No 23% da poboación de menor renda un 25% das persoas non voaron nunca e outro 25% non o fixo nos últimos cinco anos. Pola contra, nos segmentos de maior renda, menos do 5% dos individuos non viaxou en avión nos últimos doce meses. En Suecia en 2006, o 4,5% da poboación con renta superior a 500.000 coronas, acapara o 65,6% dos viaxes en avión. 

Constatado o fracaso das subvencións ás compañías aéreas como ferramenta para incrementar o número de turistas, estes poucos datos deslabazados que acabamos de expoñer, poñen de manifesto a profunda inxustiza social que supoñen estas prácticas. Estamos subvencionando directamente con diñeiro público á minoría da cidadanía que se encadra nos segmentos con máis alto nivel de renda.

3 comentários:

  1. O que vai pasar, o que pasa sempre é que a Xunta inviste cartos a moreas nun destes aeroportos, ó que se podería chamar central de Galicia, inviste tamén cartos e influencia politica a outro que por si mesmo sen axuda ningunha non atrae a ningún viaxeiro de fóra. Os concellos todos, canto máis ó norte máis invisten para captar vóos incluso a costa de estragar conexións que xa funcionan noutros sitios.
    O resultado é que os de Vigo temos que ir a Madrid e bus e morrer de sono mentres agardamos no Porto por unha conexión a Vigo.
    Tamén foi unha idea intelixente de carallo poñer ese aborto de AVE entre Santiago Ourense e A Coruña, marxinando á primeira cidade do país. Marxinando os dous fluxos de circulación máis importantes de Galicia. O A Coruña -Vigo e o Ourense-Vigo. E así nos vai con esta política caciquil. Vigo paga A Coruña provincia goza dos nosos cartos...

    ResponderExcluir
    Respostas
    1. Compartindo algunhas das cousas que dis, aquí so pretendía poñer en evidencia a irracionalidade das subvencións ás compañías aéreas para que manteñan algunhas liñas mentres dura a subvención. Liñas que cancelarán ao día seguinte de que se lles deixe de pagar.
      Saúde,

      Excluir
  2. ya ni quiero subir al avión, todo esta muy caro hoy día!

    ResponderExcluir

No faiado